नेकपा एमालेको निर्वाचन समीक्षा तथा पार्टी पुनर्गठन कार्यदलको बैठक बस्दैछ।
शुक्रबार बिहान ११ बजे कार्यदलको बैठक बस्ने तय भएको एमाले प्रचार–प्रसार विभाग प्रमुख निरज आचार्यले जानकारी दिए।
बैठक पार्टी केन्द्रीय कार्यालय च्यासलमा बस्नेछ।
एमालेले जेठ १० गते पार्टीलाई वैचारिक, राजनीतिक र संगठनात्मक रूपमा एकताबद्ध बनाउन पार्टी शुद्धीकरण, सुदृढीकरण तथा रूपान्तरणसहितको पुनर्गठन कार्ययोजना तयार गर्न कार्यदल गठन गरेको थियो।
उपाध्यक्ष रामबहादुर थापा ‘बादल’को संयोजकत्वमा गठित कार्यदल १५ सदस्यीय छ।
महासचिव शंकर पोखरेल कार्यदलका सदस्यसचिव छन्।
महासचिव पोखरेलले एक महिनाअघि नै पार्टी उपाध्यक्ष तथा कार्यदल प्रमुख थापालाई प्रतिवेदन बुझाइसकेका छन्।
थापाले उक्त प्रतिवेदन पार्टी अध्यक्ष केपी शर्मा ओलीलाई बुझाएका छन्।
आजको बैठकमा उपाध्यक्ष एवम् कार्यदलका संयोजक थापाले पनि अध्यक्ष ओलीको निर्देशनमा आफ्नो छुट्टै प्रतिवेदनमा प्रस्तुत गर्ने स्रोतले बताएको छ।
स्रोतका अनुसार थापाको प्रतिवेदनमा ओलीको विकल्प रोज्न नहुने लगायत उल्लेख छ। थापाले आफ्नो प्रतिवेदनमा ७० वर्षे उमेर हद दुई कार्यकालको बचाउ पनि गरेका छन्।
महासचिव पोखरेलले तयार पारेको प्रतिवेदनमा भने पछिल्लो विधान अधिवेशनबाट हटाइएको ‘७० वर्षे उमेर हद’ र मुख्य पदमा ‘बढीमा दुई कार्यकाल’को व्यवस्था पुनः लागू गर्न प्रस्ताव गरिएको छ।
६५ पृष्ठ लामो प्रतिवेदनमा एउटै व्यक्ति लगातार दुई पटकभन्दा बढी एउटै कार्यकारी पदमा रहन नपाउने व्यवस्था गर्नुपर्ने उल्लेख छ।
त्यस्तै, दुई पटकभन्दा बढी प्रधानमन्त्री, मन्त्री वा सांसद हुन नपाउने व्यवस्था गरी अवसरको न्यायोचित वितरण गर्नुपर्ने प्रस्ताव पनि प्रतिवेदनमा गरिएको छ।
-1746009348.jpg)
